الصفحة دي بتشرح إيه البيانات اللي بنجمعها لما تستخدمي موقع إيمان الشامي، وبنستخدمها في إيه، ومين يقدر يشوفها.
البيانات اللي بنجمعها
- بيانات الحساب: الاسم، الإيميل، رقم الموبايل أو الواتساب، البلد، تاريخ الميلاد، النوع، واللغة اللي اخترتيها.
- الطلبات والدفع: الطلبات اللي بتبعتيها، وصور إيصالات التحويل اللي بترفعيها، وبيانات الدفع اللي بنسجلها (المبلغ والعملة وطريقة الدفع ورقم العملية). مفيش دفع أونلاين على الموقع، ومش بنحتفظ ببيانات كروت.
- التعلم: الدروس اللي خلصتيها، وإجاباتك في الامتحانات، ونتايج الاختبارات الشخصية، والشهادات.
- الجلسات: مواعيد حجوزاتك، وإجاباتك على فورم أول حجز. الإجابات دي ممكن يبقى فيها معلومات حساسة عن صحتك النفسية، ومحدش بيشوفها غير إيمان الشامي واللي هي تديله صلاحية.
- اللي بتكتبيه: أسئلة الدروس، والتقييمات، والتعليقات، والرسايل الخاصة، ورسايل فورم التواصل.
- بيانات تقنية: عنوان الـ IP بنستخدمه عشان نعرف بلدك ونعرض الأسعار بالعملة المناسبة، والتحديد ده بيتم على السيرفر بتاعنا من غير ما البيانات تتبعت لحد.
بنستخدم البيانات في إيه
- إننا نفتحلك الكورسات والكتب والاختبارات اللي طلبتيها، ونأكد الجلسات.
- إننا نتواصل معاكي بخصوص طلباتك وجلساتك، ونبعتلك الإشعارات والتذكيرات.
- إننا نحمي المحتوى: الفيديوهات والكتب بيظهر عليها اسمك وإيميلك كعلامة مائية.
- إننا نحسّن الموقع، بس لو وافقتي على كوكيز التحليلات.
رسايل الأخبار والعروض
مش بنبعتلك أخبار أو عروض أو كورسات جديدة على الإيميل غير لو وافقتي على ده في التسجيل أو في إعدادات حسابك، وبنسجّل تاريخ موافقتك. في آخر كل رسالة منهم لينك تلغي بيه الاشتراك بضغطة واحدة من غير ما تدخلي حسابك، وتقدري كمان توقفيها من إعدادات حسابك. الرسايل دي بتتبعت عن طريق خدمة إرسال إيميلات، ومش بنتابع مين فتحها أو ضغط على لينكاتها. الإيميلات الخاصة بطلباتك وجلساتك وحسابك، ورسايل الخدمة عن حاجة مشتركة فيها (زي درس جديد في كورسك أو تغيير في المواعيد)، بتوصلك في كل الأحوال.
مين يقدر يشوف بياناتك
- إيمان الشامي وفريق العمل، وكل واحد بيشوف اللي محتاجه لشغله بس حسب صلاحياته.
- مزودين خدمات بنستخدمهم عشان الموقع يشتغل: الاستضافة، وإرسال الإيميلات، و VdoCipher لعرض الفيديوهات المحمية (بيستقبل اسمك وإيميلك عشان العلامة المائية).
- Google Analytics و Meta، بس لو وافقتي في شريط الكوكيز.
مش بنبيع بياناتك لأي حد.
الكوكيز
فيه كوكيز ضرورية عشان الموقع يشتغل، زي تسجيل الدخول واللغة والوضع الفاتح أو الغامق. كوكيز التحليلات والإعلانات (Google Analytics و Meta Pixel) مش بتشتغل غير لو وافقتي، وتقدري تغيّري رأيك في أي وقت من "إعدادات الكوكيز" تحت في الصفحة.
حسابك وبياناتك
تقدري تعدّلي بياناتك من إعدادات حسابك. لو مسحتي حسابك، الحساب بيتقفل وبيختفي، والبيانات بتفضل محفوظة عشان لو رجعتي سجّلتي بنفس الإيميل تقدري ترجّعي حسابك بكل محتواه. لو عايزة بياناتك تتمسح نهائياً، ابعتيلنا من صفحة التواصل.
التعديلات على السياسة دي
ممكن نعدّل السياسة دي، وتاريخ آخر تحديث بيبان فوق في الصفحة.